ចម្លើយសម្រាប់អ្នក
តើអ្នកដឹងទេថា មានមនុស្សម្នាក់ដែលដឹងអ្វីគ្រប់យ៉ាងអំពីអ្នក? នោះគឺជាព្រះអម្ចាស់ដែលបានបង្កើតពិភពលោកទាំងមូល និងរបស់សព្វសារពើផង។ ព្រះយេស៊ូវគឺជាបុត្រារបស់ព្រះអម្ចាស់ ហើយទ្រង់ក៏ជ្រាបនូវអ្វីៗគ្រប់យ៉ាងដែលអ្នកបានធ្វើ។ ទ្រង់ជ្រាបអំពីអតីតកាល បច្ចុប្បន្នកាល និងអនាគតកាល។ ទ្រង់ស្រឡាញ់អ្នក និងព្រមយាងមកលើផែនដីនេះដើម្បីសង្គ្រោះអ្នកពីបាប។ ទ្រង់មានផែនការសំរាប់ជីវិតរបស់អ្នកដោយនាំមកនូវសុភមង្គលសំរាប់អ្នក។
ថ្ងៃមួយ ព្រះយេស៊ូវបានធ្វើដំណើរជាមួយមិត្ដរបស់ទ្រង់។ ទ្រង់បានយាងទៅភូមិមួយនៅស្រុកសាម៉ារី។ព្រះយេស៊ូវបានសំរាកនៅក្បែរអណ្ដូងទឹកមួយ នៅពេលនោះ មិត្ដរបស់ទ្រង់បានទៅទិញម្ហូបអាហារអស់ហើយ។
ពេលដែលទ្រង់កំពុងតែគង់នៅទីនោះ មានស្ដ្រីម្នាក់មកដងទឹកពីអណ្ដូង។ ព្រះយេស៊ូវបានសួរថា តើនាងអាចឲ្យទឹកខ្ញុំទទួលទានបន្តិចបានទេ?
អានសាច់រឿងទាំងអស់ក្នុងចំណងជើង ចម្លើយសម្រាប់អ្នក
ស្ដ្រីនោះភ្ញាក់ផ្អើលយ៉ាងខ្លាំង “លោកម្ចាស់សុំទឹកខ្ញុំ?តើលោកម្ចាស់មិនដឹងទេឬអីថា ខ្ញុំជាសាសន៍សាម៉ារី ប៉ុន្តែលោកម្ចាស់ជាសាសន៍យូដា? សាសន៍យូដា និងសាសន៍សាម៉ារី គឺមិនត្រូវគ្នានោះទេ!”
ព្រះយេស៊ូវតបយ៉ាងសុភាពថា "បើនាងពិតជាដឹងច្បាស់អំពីព្រះអម្ចាស់ ហើយនិងអ្នកដែលនាងកំពុងនិយាយជាមួយ នាងនឹងសុំឲ្យខ្ញុំប្រទានទឹកដែលរស់ដល់នាងវិញមិនខាន។ ខ្ញុំនឹងពេញចិត្ដឲ្យ"។
ស្ដ្រីម្នាក់នោះមើលទៅទ្រង់យ៉ាងភ្ញាក់ផ្អើល ហើយនាងនិយាយថា “លោកម្ចាស់ អណ្ដូងនេះជ្រៅណាស់ លោកម្ចាស់ក៏គ្មានអ្វីដងទឹកទេ “តើលោកម្ចាស់ធ្វើដូចម្ដេចទើបអាចដួសទឹករស់នោះបាន”?។
ព្រះយេស៊ូវក៏បានឆ្លើយតបទៅនាងវិញថា “អស់អ្នកណាដែលផឹកទឹកអណ្ដូងនេះ នឹងត្រូវស្រេកទៀត តែអ្នកណាដែលផឹកទឹកខ្ញុំឲ្យ នោះនឹងមិនស្រេកទៀតឡើយ។”
ស្ដ្រីនោះបាននិយាយថា “លោកម្ចាស់ សូមឲ្យទឹកនោះមកខ្ញុំផង ដូចនេះខ្ញុំនឹងមិនស្រេកទៀតទេ ហើយក៏មិន
បាច់មកដងទឹកនៅទីនេះទៀតដែរ”។
ព្រះយេស៊ូវមានបន្ទូលថា “ទៅប្រាប់ប្ដីរបស់នាងហើយចាំត្រឡប់មកវិញ”។
នាងតបថា “ខ្ញុំម្ចាស់គ្មានប្ដីទេ”។
ព្រះយេស៊ូវមានបន្ទូលថា “នាងនិយាយថា គ្មានប្ដីនោះត្រូវហើយ។ នេះជាការពិត តែកាលពីមុននាងមានប្ដី៥នាក់ ហើយម្នាក់ដែលនាងបានរស់នៅជាមួយឥឡូវនេះ មិនមែនជាប្ដីនាងទេ”។
នាងងឿងឆ្ងល់យ៉ាងខ្លាំងថា “តើបុរសម្នាក់នេះដឹងពីខ្ញុំដោយរបៀបណា? លោក! ខ្ញុំអាចយល់ហើយថា លោកគឺជាហោរារបស់ព្រះ”។ “ខ្ញុំមានសំណួរមួយសំរាប់លោក សាសន៍របស់ខ្ញុំបានគោរពបូជាព្រះនៅទីកន្លែងនេះ ប៉ុន្តែមានគេនិយាយថា គឺមានតែក្រុងយេរូសាឡឹមទេដែលជាកន្លែងសម្រាប់គោរពបូជាដល់ព្រះជាម្ចាស់”។ ព្រះយេស៊ូវមានបន្ទូលទៅនាងថា "នោះមិនសំខាន់ទេថាកន្លែងណាដែលយើងគោរពនោះ។ សព្វថ្ងៃនេះ អ្នកដែលជឿលើព្រះជាម្ចាស់ អាចគោរពបូជា ព្រះវរបិតាដោយវិញ្ញាណនិងសេចក្ដីពិតគ្រប់ទីកន្លែង”។
នាងបាននិយាយទៀតថា “ខ្ញុំដឹងថាព្រះមេស្ស៉ី(អ្នកសង្គ្រោះ) នឹងយាងមក ដែលគេគ្រប់គ្នាហៅទ្រង់ថា ព្រះគ្រីស្ទ។ នៅពេលដែលទ្រង់យាងមក ទ្រង់នឹងប្រាប់យើងអំពីអ្វីគ្រប់បែបយ៉ាង។”
បន្ទាប់មក ព្រះយេស៊ូវមានបន្ទូលទៅនាងថា “គឺខ្ញុំហ្នឹងហើយ”។
ងបានទុកក្អមទឹករបស់នាង ហើយរត់ទៅក្នុងទីក្រុង ព្រមទាំងស្រែកថា “មក!” “មកមើលលោកម្ចាស់ម្នាក់នេះ ដែលបានប្រាប់ខ្ញុំអំពីរឿងគ្រប់យ៉ាងដែលខ្ញុំធ្លាប់បានធ្វើ!។ តើគាត់មិនមែនជាព្រះគ្រីស្ទទេឬអី?”
បន្ទាប់មក មនុស្សពីទីក្រុងបានទៅជួបព្រះយេស៊ូវ។ មានមនុស្សជាច្រើនបានជឿថា ទ្រង់គឺជាព្រះគ្រីស្ទជាអង្គសង្គ្រោះ ពីព្រោះទ្រង់ជ្រាបអ្វីគ្រប់យ៉ាងអំពីពួកគេ។ ទាំងអស់នេះគឺមាននៅក្នុងព្រះគម្ពីរ យ៉ូហាន ៤:៣-៤២
ព្រះយេស៊ូវជ្រាបកិច្ចការទាំងអស់អំពីយើងរាល់គ្នា ពីរឿងល្អ ក៏ដូចជារឿងអាក្រក់ផងដែរ។ យើងពិតជាចង់លាក់នូវភាពអាក្រក់ដែលយើងបានធ្វើនៅក្នុងជីវិត ប៉ុន្ដែយើងភ្លេចថា យើងមិនអាចលាក់បាំងអ្វីមួយពីព្រះយេស៊ូវបានទេ។ ទ្រង់បានយាងមកដើម្បីសង្គ្រោះនិងរំដោះយើងឲ្យរួចផុតពីទណ្ឌកម្មនៃកំហុសដែលយើងបានប្រព្រឹត្ត។ ទ្រង់អាចជួយកំសាន្តចិត្តអស់អ្នកដែលមានទុក្ខព្រួយ និងខ្វល់ខ្វាយនៅក្នុងចិត្ត ហើយប្រទាននូវចិត្តសន្តិភាពដល់យើង។ ទ្រង់បានសុគតដើម្បីលុបលាងបាបរបស់យើង ហើយទ្រង់ក៏បានរៀបចំកន្លែង
សំរាប់យើងនៅលើឋានសួគ៌នៅពេលយើងស្លាប់ទៅ។ ព្រះយេស៊ូវគឺជាចម្លើយទាំងអស់នៃសំនួររបស់យើង។ ទ្រង់ចង់ក្លាយជាមិត្ដរបស់អ្នក។ ទ្រង់ចង់បំពេញនូវភាពទទេរស្អាតនៅក្នុងចិត្ដរបស់អ្នក។ ទ្រង់អាចជំនួសនូវភាពភ័យខ្លាច និងភាពខ្វល់ខ្វាយឥតស្រាកស្រាន្តរបស់អ្នក ហើយបំពេញវិញនូវចិត្តស្ងប់និងសុខសាន្តនៅក្នុងចិត្ត។
ព្រះយេស៊ូវមានបន្ទូលថា “ចូរមករកខ្ញុំ ហើយខ្ញុំនឹងឲ្យអ្នករាល់គ្នាបានសំរាក” (ម៉ាថាយ ១១:២៨) ដោយគ្រាន់តែអធិស្ឋានទៅព្រះ ហើយទូលទ្រង់រាល់កំហុសរបស់អ្នក ព្រមទាំងទទួលសារភាពអំពើបាប
របស់អ្នក។ សុំឲ្យព្រះយេស៊ូវចូលមកគង់ក្នុងចិត្តរបស់អ្នក។ នៅពេលដែលអ្នកថ្វាយខ្លួនដល់ព្រះជាម្ចាស់ ដោយក្តីជំនឿ នោះទ្រង់នឹងគង់នៅក្នុងចិត្ដរបស់អ្នក។ ព្រះវត្ដមានរបស់ទ្រង់នឹងផ្ដល់នូវភាពរីករាយដល់អ្នក។ ទ្រង់នឹងប្រទានកំលាំង និងគោលដៅជីវិតដល់អ្នក។ ទ្រង់នឹងក្លាយជាចម្លើយសំរាប់អ្នក៕៚
